Obradoiro de interpretación para TV. Impartido por Miguel Conde

Etiquetas:

Coa inestimable colaboración de AISGE-Fundación AISGE a AAAG convoca este obradoiro a fin de semana do 4 e 5 de xuño en Santiago de Compostela

Introdución:

Por desgraza o noso traballo no sector audiovisual e, especialmente na televisión, faise cada vez en menor tempo. Case nunca os actores e as actrices temos a oportunidade nunha rodaxe para probar, repetir tomas ou facer visionados das secuencias xa feitas.

Por outra banda, a produción de series diarias tanto en Galicia como no resto de España é cada vez máis prolífica e o problema dos tempos acentúase nestes traballos.

Esta carencia no noso traballo, sumada aos nervios e a tensión propia dunha rodaxe, fan que precisemos ter como profesionais a capacidade, ou o sangue frío, para lograr con rapidez a concentración necesaria para traballar desde a verdade e tamén poder mudar a nosa proposta en tempo récord se é que o director fixo outra lectura do noso personaxe.

Obxectivos:

Este obradoiro intensivo de fin de semana, trata de ofercernos esas ferramentas e a seguridade para traballar nunha rodaxe profesional de tempos reducidos. Vai dirixido a actores e actrices profesionais, con independecia do seu nivel de experiencia, e trátase dun curso eminentemente práctico de 20 horas de duración que pretende simular a realidade dunha rodaxe.

O docente

Miguel Conde é un director e realizador galego que ten no seu currículo series de televisión diarias como Valderrei da Televisión de Galicia; Bon Día, Bonica emitida por Canal 9 na que tamén traballou como coach de actores Yo Quisiera, para Mediaset; Gran Reserva: El Origen ou Seis Hermanas, estas últimas para TVE.

Tamén asumiu a dirección da longametraxe O Bonito Crime do Carabineiro e das series galegas Padre Casares e Serramoura e da valenciana L´Alquería Blanca. A nivel estatal ten dirixido títulos para emisión en prime time como 90-60-90 Diario de una adolescente, ou Bajo Sospecha.

Datas e duración:

O obradoiro ten unha duración de 20 horas, o sábado 4 e domingo 5 de xuño de 9:00h a 14:00h e 15:00h a 20:00h

Lugar:

Sede de AISGE en Santiago de Compostela Rúa do Monte dos Postes 14 https://goo.gl/maps/Zx4vFJRa5Bu

Prezo:

80 euros socixs da AAAG e/ou AISGE. 210 euros non socixs

Prazas e selección de candidatos:

Este obradoiro ten 14 prazas. A admisión realizarase por perfil.

Inscrición:

Ata o domingo 29 de maio, ás 23:59h. utilizando a caixa de inscrición da cabeceira deste texto.

Se es socix da AAAG, so tes que iniciar a túa sesión na páxina e premer “inscribirme”. O obradoiro aparecerá no apartado “inscricións” do teu espazo privado.

Reserva praza e forma de pago

Comunicarase a listaxe de admisión o mércores 1 de xuño. Na mesma comunicación de admisión indicarase a forma de pago

No caso de non acadar solicitudes suficientes a organización poderá suspender a realización do obradoiro.