“A dramaturxia actoral e os procesos de creación colectiva". Laboratorio/taller de creación con Teatro En Vilo. Vigo 6, 7 e 8 de xuño

Etiquetas:

Este taller dirixido a actores/actrices, directores/as e dramaturgos/as é unha oportunidade para achegarse a procesos de creación colectiva onde o actor ou actriz ten un rol fundamental, xa que ha de xerar e organizar o material escénico traballando desde a súa individualidade, os seus referentes e a súa visión do mundo.

Tamén é esta unha oportunidade para que directores/as e dramaturgos/as desenvolvan ferramentas para provocar e organizar os distintos imaxinarios e propostas dos actores/creadores, á vez que envorcan as súas propias ideas no proceso de creación.

Neste taller poñeremos a disposición dos participantes unha ampla gama de recursos físicos, coreográficos, dramatúrxicos e de improvisación que contribuirán a desenvolver o potencial creador de cadaquén, así como a articular unha visión artística e unha linguaxe escénica propia; todo iso nun contexto único de colaboración e encontro con outros creadores.

Profundaremos na importancia do corpo e do movemento como fonte da imaxinación do actor/actriz creador/a e aprenderemos a organizar a información no espazo e no texto dentro dun marco de xogo, liberdade e colaboración.

Contidos

· Adestramento físico e vocal

· Análise de movemento no espazo escénico

· Estudo de principios fundamentais para a construción de estruturas dramáticas a través de exercicios de movemento e escritura

· Composición coreográfica e dramatúrxica

· Disparadores temáticos e improvisacións guiadas

· Tempo de ensaio e creación (individual e/ou colectivo)

· Feedback

Obxectivos

· Redescubrir a relación actor/actriz, dramaturgo/a, director/a e repensar os roles no proceso creativo.

· Incrementar a autonomía creativa do grupo e os individuos, o seu compromiso, responsabilidade e xenerosidade.

· Desenvolver a capacidade de xogo, imaxinación e intuición artística.

· Xerar disparadores creativos a partir de eixos temáticos e xestionar a información xerada polos mesmos.

· Integrar nocións dos procesos de creación colectiva e do traballo en grupo.

· Estudo da expectativa e tensión dramática como ferramentas fundamentais na construción de historias.

· Coñecer desde o punto de vista do corpo en movemento os principios de construción dramática.

· Practicar a relación entre movemento e imaxinación e a súa aplicación na creación escénica e artística.

· Estudo do tempo, ritmo e espazo como elementos fundamentais no texto escrito e a posta en escena.

· Que o alumno sexa capaz de vincular o seu traballo co seu contexto, a través da observación precisa da contorna.

· Recoñecemento do corpo voz e da personalidade creadora.

· Desenvolver a capacidade de relacionarse cun público no “aquí e agora”.

· Os diferentes modos de relacionarse co espazo, percibilo, movelo e moverse nel.

Teatro En Vilo: a Compañía

Teatro En Vilo é unha compañía internacional de teatro afincada en Madrid e fundada en Londres en 2012. Teatro En Vilo funciona como un colectivo que serve como plataforma para colaboracións internacionais e interdisciplinarias entre creadores de escena, artistas e investigadores procedentes de países de todo o mundo.

A compañía persegue un constante diálogo coa súa contorna social, político e persoal, o que obriga constantemente a renovar tamén a súa linguaxe escénica. Os seus espectáculos, performances, eventos e talleres buscan situarse na delgada liña que separa o teatro da vida e a ficción da realidade. Combinando o improvisado e o coreográfico, o grotesco e o autobiógrafico, o humor absurdo e a comedia xestual, a tenrura e a irreverencia, Teatro en vilo lanzouse á apaixonante aventura de tentar desentrañar o tempo en que vivimos.

Na nosa vontade de levar o teatro fóra dos escenarios desenvolvemos nos últimos anos unha batería de talleres e cursos que xogan un papel fundamental na traxectoria da compañía, pois serven como exploración do teatro que queremos facer e como outra maneira de entender o proceso e a finalidade do noso traballo.

Biografías artísticas das docentes

Andrea Jiménez

Andrea é co-directora artística da compañía Teatro EnVilo, fundada en Londres en 2012. Esta creadora teatral, que vive entre Madrid e Londres, é licenciada en Dereito e posgraduada en Artes Escénicas pola London International School of Performing Arts. Traballou como directora e actriz para reputadas compañías de teatro en Francia, España e Inglaterra. Ten ademais, unha ampla experiencia no mundo da produción de espectáculos e festivais, e no desenvolvemento de proxectos pedagóxicos que involucren o teatro en diferentes institucións educativas e grupos profesionais.

Dirixiu espectáculos para compañías internacionais como son Hispanic Breakdown (“ The Copla Musical”) e Fun in the Oven (“ Canary Girls”). Tamén é co-directora, xunto con Noemi Rodríguez, da multipremiada peza “ Interrupted”, gañadora do premio Talent Madrid 2013 e recentemente finalista ao Premio Max 2016 á Mellor Autoría Revelación.

Como actriz traballou con compañías de reputada traxectoria como Blind Summit, Improbable Co., English National Opera (Londres), Glass- Eye Theatre (Londres), e Mimox Teatro (Madrid).

No mundo da produción colaborou coa Fundación Botín e o CSIC, co Talent Festival nos Teatros del Canal e para a recoñecidísima compañía de circo inglesa Gandini Jugling. Ademais impartiu e guiou talleres e laboratorios sobre creación colectiva, clown e teatro físico en Madrid, Londres, París, Mumbai, Bolonia, Kerala e Auroville.

Noemi Rodríguez

Actriz, directora, autora e coreógrafa española fórmase na ESAD de Galicia (onde recibiu unha matrícula de honra polo seu proxecto final de carreira) e despois realiza Máster en Artes Escénicas na Universidade de Vigo e un curso de posgrao na London International School of Performing Arts grazas á prestixiosa bolsa de estudos da Fundación Barrié.

Noemi traballou en distintos países como Francia, Portugal, España, Inglaterra, Estados Unidos e India. Como actriz e bailarina traballou para institucións de prestixio como o Centro Dramático Galego, o Núcleo de Experimentação Coreográfica do Porto, a English National Opera, ou Cuarta Parede e reputadas compañías europeas como Blind Summit ou Improbable Theater entre outras.

Ademais dirixiu varias obras de teatro entre elas Interrupted (comedia gestual), Escenarios de Chamberí (teatro comunitario), Malena, llena eres de gracia (teatro documental) e fai a dirección de movemento en “The Canary Girls” (teatro físico)

Tamén impartiu cursos e conferencias sobre Interpretación, Creación Teatral, Creación Colectiva e Movemento en diferentes universidades como as Universidades de Oxford, Bolonia, Puna, Calcuta, Liceo Francés de Istambul ou LISPA. Ademais de ensaios, Noemi é autora de catro obras dramáticas as cales foron amplamente representadas en Europa. Así é que en 2015 recibe unha Candidatura aos Premios Max na categoría de Mellor Autoría revelación pola súa obra " Interrupted". Actualmente é codirectora artística de Teatro EnVilo e continúa colaborando con artistas e compañías de teatro europeas.

Datas e duración:

6, 7 e 8 de xuño de 2018, en horario de 16h a 21h. 15 horas

Lugar:

Escola Superior de Arte Dramática de Galicia. Poza Cabalo, s/n, 36212 Vigo, Pontevedra https://goo.gl/maps/oMditbMcoY22

Prazas e selección do alumnado:

Este obradoiro ten 25 prazas. Estas prazas estarán repartidas do seguinte xeito: 5 prazas para directores/as de escena. 10 prazas para alumnos/as da ESAD. 10 prazas para actores/actrices profesionais. A admisión no obradoiro farase mediante valoración por parte das docentes do currículo e de unha carta de motivación que teredes que anexar á vosa solicitude de inscrición ou enviala á caixa de correo info@aaag.es.

Prezo:

Socixs AAAG e /ou AISGE: 60 euros

Se levas no paro 6 meses ou traballastes 10 días ou menos nese tempo, tes unha redución do 50% no prezo. Terás que presentar a tarxeta do paro selada ou copia da vosa vida laboral para accederes a este desconto.

Alumnado ESAD: 30 euros

Non socixs: 90 euros

Inscrición:

Desde o 16 de maio ata o 31 de maio ás 23:59h. a través do formulario que figura na parte superior desta páxina

Se es socix da AAAG, só tes que iniciar a túa sesión na páxina e premer “inscribirme” no formulario. O obradoiro aparecerá no apartado “inscricións” do teu espazo privado.

Reserva praza e forma de pago

Comunicarase a listaxe de admisión o 1 de xuño. De haber máis solicitudes que prazas constituirase unha lista de espera.

Na mesma comunicación de admisión indicarase a forma e datas de pagamento. No caso de que algunha das persoas admitidas non o efectúe nas datas indicadas, a súa praza será adxudicada á seguinte persoa na lista.

De non acadar solicitudes suficientes, a organización poderá suspender a realización do obradoiro.