Os premios

Toda a información sobre os María Casares

Premio de Honra Marisa Soto

A Asociación de Actores e Actrices de Galicia decidiu en 1997 - ano no que se celebrou a primeira edición dos Premios de Teatro María Casares - crear un premio honorífico que homenaxease e celebrase tanto a traxectoria artística de persoas que co seu traballo impulsasen a profesionalización do sector, como tamén a institucións que apoiasen o desenvolvemento das artes escénicas. A Asociación escolleu o nome de Marisa Soto para bautizar tal distinción pola súa carreira interpretativa, polo seu amplo papel na construción do tecido teatral no país e polos afectos que esperta no seo do mundo escénico.

Desde aquel 1997, a Asociación de Actores e Actrices de Galicia distinguiu co Premio de Honra Marisa Soto as seguintes persoas e entidades:

Agustín Magán

Manuel Lourenzo

Maruxa Villanueva

Manuel Gallart

Grupo Abrente

Fundación Teatro Principal de Tui

Celebración dos 25 anos de Teatro Profesional

Padroado da Cultura do Concello de Narón

Luís Álvarez Pousa

Dorotea Bárcena

Concha Abad

Rubén García

Ana Romaní

Gonzalo Uriarte

Xan Cejudo

Sala Nasa

Pilar Pereira

Xosé Manuel Olveira 'Pico'

Vicente Montoto

Revista Galega de Teatro

Eduardo Alonso

Rosa Álvarez

Aulas de teatro universitario de Ourense e Santiago

Flor Maceiras

Mostra Internacional de Teatro cómico e Festivo de Cangas

Cloti Vaello

BIOGRAFÍA MARISA SOTO

Nada en Silleda en 1955, Marisa Soto licenciouse en Farmacia ainda que xamais chegou a exercer. O seu espazo non eran as reboticas, mais os escenarios. Así, a súa carreira profesional desenvolveuse por completo sobre as táboas ou diante das cámaras. Estreouse no mundo das artes escénicas con Teatro Antroido, a compañía de Vidal Bolaño e Laura Ponte. A primeira montaxe na que traballou foi deste xeito Amor e Crimes de Xan Panteira, de Blanco Amor (1975), e As falcatrúas do marqués de Patacón, de Euloxio Ruibal (1976). Tras estes primeiros traballos, a intérprete formou parte dos elencos en montaxes como Lenta raigame, de Francisco Taxes e levada á escena por Teatro Andrómena; As criadas, de Jean Gentet e adaptada pola Compañía Luis Seoane, ou Ensaio festivo para unha marcha fúnebre, texto de Griselda Gambaro dirixido por Xúlio Lago,

En 1984, nace o Centro Dramático Galego. Soto forma parte do corpo actoral da montaxe fundacional: o Woyzeck dirixido por Xúlio Lago. A partir dese momento, participará na institución de teatro público noutra serie de producións, entre as que destacan O enfermo imaxinario (1986), As alegres casadas (1989) e O incerto señor don Hamlet (1991). Posteriormente, implícase no proxecto Teatro Malbarate e traballa en obras como Xogo de damas, texto de Rei Ballesteros con dirección de Eduardo Alonso; Galicia SL, compendio de textos de autores galegos, ou Xogos á hora da sesta, dirixida por Cándido Pazó.

No mundo audiovisual, Marisa Soto participou nunha longa serie de producións, destacando o seu traballo na histórica Divinas palabras, de García Sánchez (1987) ou na fita Continental, unha película de Xavier Villaverde que forma, xunto a Urxa e Sempre Xonxa, a tríade fundacional do audiovisual galego.

Marisa Soto finou en 1998 e o seu legado foi entregado ao Concello de Silleda. Este consistorio extraviou antes de 2011 todo o material cedido. Os documentos, a día de hoxe, seguen sen aparecer.